Euskaltzaindiak, ekainaren 30ean, Zaldibian egin zuen osoko batzarrean, Arabako herri-izendegiaren beste zerrenda bat onartu zuen hizkuntza-gaien arloan. Arabako Mendialdeko herrien eta herritarren euskal izenak onartu ziren: Arraia-Maeztu, arraiar, maeztuar; Bernedo, bernedar; Kanpezu, kanpezuar; Harana, harandar; Lagran, lagrandar; Urizaharra, urizahartar.
Euskaltzaindiaren arautegi aldaketa indarrean jarriko da Estatuko Aldizkari Ofizialean argitaratzen den momentuan. Izan ere, ekainaren 16an, Espainiako Ministro Kontseiluak Akademiak proposatutako arautegi aldaketa onartu zuen. Horrek esan nahi du, datozen hilabeteotan, hainbat aldaketa izango direla Euskaltzaindian.
Ekainaren 20an sinatu zen Nafarroako Gobernuaren eta Euskaltzaindiaren arteko aurtengo protokoloa. Akademiaren izenean, Andres Urrutia euskaltzainburuak sinatu zuen eta, Foru Gobernuaren izenean, Pedro Pegenaute Unibertsitate eta Hizkuntza Politikarako zuzendari nagusiak. Akordio horren arabera, hauek dira 2006. urterako eginkizun nagusiak:
Ekainaren 20an, Iruñean, Nafarroako Gobernuaren egoitzan, Mendaur bildumaren I. liburukiaren aurkezpena egin zen: Jose Mari Satrustegi: ereile eta lekuko, Andres Iñigok prestatua.
Mendaur bildumaren lehen bi liburukiak hauek dira: Jose Mari Satrustegi: ereile eta lekuko eta Baztango mintzoa: gramatika eta hiztegia, Pello Salaburuk prestatua. Bilduma hau Nafarroako Gobernuak eta Euskaltzaindiak sortu dute, bi erakundeen arteko hitzarmenaren eraginez.
Ekainaren 29an, Deustuko Unibertsitatearen Donostiako campusean (EUTGn), areto nagusian, Juan Mari Lekuona eta Patxi Altuna euskaltzainen hilberri-txostenak irakurri ziren:
Andres Urrutia euskaltzainburuaren agurra
Ana Toledo: Juan Mari Lekuona... eta hitza lanabes bihurtu zuen
Miren Azkarate: Patxi Altuna: jesuita, euskaltzalea, irakaslea eta euskaltzaina
Ekainaren 30ean, arratsaldeko 6:15ean, Zaldibiako Udalak eta Euskaltzaindiak Frantzisko Ignazio Lardizabalen omenezko plaka agerian jarri zuten idazlearen Zubiaurre jaiotetxean. Aurresku dantza-saioarekin hasi zen ekitaldia eta bertaratu zirenen txaloekin amaitu. Han ziren Patxi Aierbe alkatea, Andres Urrutia euskaltzainburua, euskaltzainak, zinegotziak eta herritar ugari. Zubiaurreko horman jarri zen harrizko plakak hau dio: Frantzisko Ignazio Lardizabalen jaiotzaren (1806-1855) bigarren mendeurrenean. Zaldibia, 2006-VI-30.
Ekainaren 30ean, ostirala, Euskaltzaindia Zaldibian izan zen, batetik, hileko osoko batzarra egiteko eta, bestetik, Frantzisko Ignazio Lardizabalen omenezko bilkura ospatzeko, haren jaiotzaren bigarren mendeurrenean. Bilkura horri Patxi Aierbe Zaldibiako alkateak eta Andres Urrutia euskaltzainburuak eman zioten hasiera. Euren hitzen ostean, Mikel Zalbidek eta Beñat Oihartzabalek hitzaldi bana eman zuten.
Patxi Aierbe alkatearen ongietorria
Andres Urrutia euskaltzainburuaren agurra
Mikel Zalbide: Lardizabalen Gramatika, bere gizarte-giroan
Beñat Oihartzabal: Lardizabalen gramatikaren iturri, ezaugarri eta helburuak
Uztailaren 4an, 2005. urtean saritutako literatura-lanen argitalpenak aurkeztu ziren, Euskaltzaindiak eta Bilbao Bizkaia Kutxa Fundazioak antolatutako ekitaldian. Hauek dira argitaratu diren liburuan:
Bestalde, Euskaltzaindiak eta Bilbao Bizkaia Kutxak, bi erakundeok aspaldidanik antolatzen dituzten lau literatur sarien aurtengo deialdia kaleratu dute. Jakina denez, sariak lau dira: Txomin Agirre eleberri-saria, Toribio Altzaga antzerki-saria, Felipe Arrese-Beitia olerki-saria eta Mikel Zarate saio-saria.
Lanak aurkezteko epea 2006ko urriaren 16an amaituko da eta, lanak, helbide honetara bidaliko: Bilbao Bizkaia Kutxaren Kultur Gela Elkano, 20 48008 Bilbo. Epaimahaikoen erabakiak, 2006ko abenduaren 31 baino lehen iragarriko dira.
Uztailaren 21ean, ostirala, goizeko 11:00etan, Ana Toledo euskaltzain osoaren sarrera-ekitaldia egingo da Antzuolako Udaletxean. Hau izango da egitaraua:
Uztailaren 13an, arratsaldeko 17:00etan, Euskaltzaindiaren egoitzan egingo den ageriko bilkura berezian, euskaltzain urgazle berriei diplomak emango dizkie Akademiak. Ezaguna denez, maiatzaren 26an, Euskaltzaindiak Elantxoben egin zuen osoko batzarrean, 35 euskaltzain urgazle berri izendatu zituen.
Hau izango da egun horretako egitaraua:
![]() Bisitatu gaituzteEuskaltzaindiaren Azkue Biblioteka batzordea |