Plazaberri

Euskaltzaindiak, urtarrilaren 25ean, Bilbon egin zuen batzarrean, hau erabaki zuen:

Exonomastika. "Europako eskualde historiko-politiko nagusiak" araua osatuko duen 3. zerrenda (Britainiar uharteak eta Eskandinavia) onartu zen. Atalka onartzen ari da araugai hau eta onartzen bukatzen denean osorik argitaratuko da.

Urtarrilaren 24an, Euskaltzaindiak Jean Haritschelhar euskaltzainburu ohiari omenaldia egin zion bere egoitzan. Hogeita lau urtez euskaltzainburuorde eta hamasei urtez euskaltzainburu izan den Jean Haritschelharren omenaldira Euskal Herri osoko hainbat erakundetako ordezkariak izan ziren, besteak beste Euskararen Erakunde Publikokoak, Eskualtzaleen Biltzarrekoak, Eusko Jaurlaritzako Hizkuntz Politikarako Sailburuordetzakoak, Araba, Bizkaia eta Gipuzkoako Foru Aldundikoak eta Euskararen Nafar Institutukoak. Paulino Luesma Espainiako Gobernuak EAEn duen ordezkaria, Marc Cabane Pirinio Atlantikoetako prefeta, Jakes Abeberry Hautetsien Kontseiluko kidea, Annie Jarraud-Vergnolle senatore eta Angeluko kontseilaria eta Monique Larran-Lange kontseilari orokorra ere bertan izan ziren.

Omenaldian, Andres Urrutia euskaltzainburuak Jean Haritschelhar-i omenaldia liburua eta Remigio Mendibururen "Casa bombardeada I" izeneko eskultura eman zizkion Haritschelharri. Honen emazte Colettek, aldiz, lore sorta jaso zuen euskaltzainburuaren eskutik.

Andres Urrutia euskaltzainburuaren hitzak

Beñat Oihartzabal buruordearen hitzak

Jose Luis Lizundia diruzainaren hitzak

Jean Haritschelhar euskaltzainburu ohiaren hitzak

Argazkiak

Omenaldi honen karietara Andres Urrutiak eta Jose Luis Lizundiak komunikabideetara igorritako artikuluak:

Lizundiaren artikulua: Haritschelhar euskal herri-gizon

Urrutiaren artikulua: Jean Haritschelhar: kultura-gizona, gobernu-gizona

Urtarrilaren 25ean, hileko batzarraren bukaeran, Recuperación del Euskera en Navarra liburuaren aurkezpena egin die egileak euskaltzainei. Miquel Gros i Lladós egileak berak eman ditu liburu horri buruzko azalpenak.

Liburu hori Euskaltzaindiak argitaratu zuen 2007ko irailean, lehen aurkezpena Vianan egin zelarik. Jagon bilduma berriztatuaren 4. liburukia da.

Miquel Gros i Lladós-ek adierazi duenez, Nafarroako Parlamentuaren Hezkuntza Batzordearen gonbita jaso du, bertan lan honen nondik-norakoez hitzaldia emateko.

Urtarrilaren 24an, Jean Haritschelharri eginiko omenaldiarekin bat eginez, Euskararen Erakunde Publikoarekin 2010eko abuztura arteko iraupena duen hitzarmena sinatu zuen Euskaltzaindiak. Akademiaren izenean, Andres Urrutiak sinatu zuen, eta EEPren izenean, Max Brisson lehendakariak. Hitzarmen horrek bi erakundeen arteko lankidetza zehazten du.

Bi erakundeon arteko lankidetzaren ardatzak honako hauek izango dira: hiru alor nagusitan -Terminologian, Toponimian eta Itzulpengintzan- lan egingo duen Adituen Batzordea izendatuko da; Frantsesa-Euskara eta Euskara-Frantsesa Hiztegi Orokorra egingo da; Hizkuntza Gaitasun Egiaztapena sortuko da; Ipar Euskal Herriari begira, argitalpen bereziak sustatuko dira; Euskaltzaindiaren lana ezagutaraziko da.

Andres Urrutiaren hitzak euskaraz, frantsesez eta gaztelaniaz

Max Brissonen hitzak

Jean Haritschelhar-i omenaldia izeneko liburua, Euskaltzaindiak Jean Haritschelhar euskaltzainburu ohiari eskaintzen dion omenaldi-liburua da. Liburua Akademiaren Iker bildumaren 21. zenbakia da. Beñat Oihartzabal buruordea eta Jose Luis Lizundia diruzaina izan dira arduradunak.

Liburuaren hasieran, Andres Urrutia euskaltzainburuaren agurraz gain, Jean Haritschelharren bibliografia eskaintzen zaigu, Beñat Oihartzabalen eskutik -"Jean Haritschelharren idazlanen aurkezpena: bibliografian agertzen ez diren lanak ere ahantzi gabe..."-, baita 38 urtez Euskaltzaindiaren Zuzendaritzan izan den Haritschelharrek egindako lanaren azalpena, Jose Luis Lizundiak prestatua -"Haritschelhar 38 urte Zuzendaritzan"-.

Hizkuntza, literatura eta historiari buruz 33 kidek -euskaltzain oso, ohorezko eta Literatura Ikerketa batzordekidek- idatziriko lanek osatzen dute liburua. Lanak euskaraz idatziak dira, frantsesez eta gaztelaniaz idatzitako sei izan ezik.

Liburuaren aurkibidea

Liburuaren fitxa

Urtarrilaren 25ean, Euskaltzaindiaren egoitzan, egin du bilera batzorde honek. Bi modutako gaiak izan ditu aztergai:

• Herri administrazioek eskaturiko bi gairi buruzko irizpenak, eta
• Batzordea prestatzen ari den argitalpena.

Argazkian, ezkerretik eskuinera: Xabier Mendiguren Bereziartu, Juan Luis Goikoetxea, Andres Iñigo, Paskual Rekalde eta Joseba Butron.