2008-06-06 50. zenbakia
Euskaltzaindiak, maiatzaren 30ean, Iruñean egin zuen batzarrean, hau erabaki zuen.
Exonomastika. "Europako eskualde historiko-politiko nagusiak" araua osatuko duen 7. zerrenda (Ekialdeko eslaviarrak: Ukraina, Bielorrusia eta Errusia) onartu zen. Bestalde, arau horren 8. zerrenda (Portugal, Espainia eta Frantziako eskualde historiko batzuk) aurkeztu zen.
Bilboko Liburu Azokak babesturik, "Leturiaren egunkari ezkutua eleberriaren ekarpena XX. Mendeko euskal narratibaren testuinguruan" izeneko argitalpena aurkeztu zuen Euskaltzaindiak, Bizkaiko hiriburuan, ekainaren 3an. Argitalpena Euskera Euskaltzaindiaren agerkari ofizialaren etapa berriaren lehen zenbakia da, eta haren bitartez Leturiaren egunkari ezkutua eleberria argitaratu zeneko 50. urteurrenaren karietara, Jose Luis Alvarez Enparantza "Txillardegi" omendu nahi izan du Akademiak.
Argitalpena maiatzean aurkeztu zen Donostian, Txillardegi bertan izan zela. Bilboko aurkezpenean, aldiz, Andres Urrutia euskaltzainburuarekin batera Sebastian Gartzia Trujillo Literatura Ikerketa batzordekidea izan zen mahaian eta berak eman zituen Euskera agerkariaren zenbaki berrian eleberri horretaz argitaratu diren txostenei buruzko zehaztasun guztiak.
Bestalde, Andres Urrutiak Euskaltzaindiaren agerkari ofizialaren aro berriaz hitz egin zuen: besteak beste, urtero hiru zenbaki argitaratuko direla azaldu zuen, horietatik batek ikerketa-lanak eta liburu aipamenak jasoko dituela gaineratuz. Izan ere, Euskaltzaindiak bere agerkari ofiziala berriztatu du eta egokitu, eduki berriak eskaintzeko asmoz. Horiek horrela, euskaltzainek eta Euskaltzaindiak antolaturiko ekitaldietan parte hartzen dutenek ez ezik, euskalgintzaren munduan dihardutenek ere Euskeran argitaratu ahal izango dituzte euren lanak.
Bilboko Liburu Azokak Henrike Knörr euskaltzain hil berria omendu zuen, ekainaren 3an, eta Ramon Zumalabe margolariak egindako Henrikeren erretratua oparitu zion familiari. Eneko Knörr seme nagusiak hartu zuen erretratua, Txari Santiago ama eta Iruri arreba bertan zituela.
Argazkian, ezkerretik eskuinera: Asier Muniategi, Liburu Azokaren koordinatzailea; Sebas Gartzia Trujillo, Andres Urrutia eta Eneko Knörr.
Liburu Azokak egindako omenaldiarekin bat egiteko asmoz, Euskaltzaindiak Henrike Knörr 1947-2008 omenezko eskuzko argitalpena aurkeztu eta zabaldu du Bilbon. Hauxe da aurkibidea: biografia; "Robert Laxalten. The Basque Hotel" (Henrike Knörr-en artikulua; In Memoriam (euskaltzainek -osoek nahiz urgazleek- Knörr-i buruz idatzi zutenaren isla); eta ohar bibliografikoa.
Honen aurkezpenean, Andres Urrutiak Henrikeren omenezko hitzak esan zituen. Euskaltzaindiak euskaltzain zendu berria omenduko duela adierazteaz gain -"hau ez da azken omenaldia izango" esan zuen- Jose Luis Lizundia zuzendaritzakideak Knörr-en omenezko hilberri-txostena egingo duela ere iragarri zuen euskaltzainburuak.
Henrike Knörr 1947-2008 argitalpena
Bestalde, maiatzaren 8an, Herria astekariak Henrike Knörr-en omenezko bi artikulu argitaratu zituen, bata Jean-Louis Davant euskaltzainak egina, bestea "Lapurtarra" ezizenez sinatua. Hona hemen artikuluak:
Jean-Louis Davant: Henrike lagünari eta Ziberotik Arabara. (Herria, 2008-5-8).
Ekainaren 3an, legeak agintzen duen bezala, Euskaltzaindiak urteko bilera egin zuen Baionan, Akademiaren Iparraldeko ordezkaritzan. Bilera horretara Ipar Euskal Herriko euskaltzain oso, ohorezko eta urgazle guztiak deituak dira. Batetik, 2007an egin ziren lanen berri eman zen, eta bestetik 2008an egingo diren eginkizunak aurkeztu ziren.
Maiatzaren 30ean sinatu zen Nafarroako Gobernuaren eta Euskaltzaindiaren arteko aurtengo hitzarmena. Akademiaren izenean, Andres Urrutia euskaltzainburuak sinatu zuen eta, Foru Gobernuaren izenean, Xabier Azanza Euskarabidea - Euskararen Nafar Institutuaren zuzendari-kudeatzaileak.
Akordio horrek babesten dituen Euskaltzaindiaren izaera orokorreko eginkizunez gain, honakoak adostu dira 2008rako:
Mapa hau Ramón Menéndez Pidalek argitaratu zuen 1950etan, berak egindako hainbat ikerketen laburpen gisa. Euskararen historiarentzat bereziki garrantzitsua den arren, ez da batere ezaguna. Gogora dezagun, bide batez, Menéndez Pidal, Espainiako Akademiako buru izateaz gain (1925-1939 eta 1947-1968) euskaltzain urgazlea izan zela Euskaltzaindiaren sorreratik (1919) eta ohorezko euskaltzain izendatua izan zela hil baino apurtxo bat lehenago (1968).