![](/dok/testu-bankua/literatura/041/images/image2.jpg)
1. Agintari militarrak Frente de Juventudes-en kanpamentua bisitatzen Orion (Gipuzkoa) 1944an. Argazkia: Vicente Martín.
Haurra izan nintzen,
haurra;
baina begietan,
belarrietan,
erraietan
ditut irakiten,
oroimenaren hotsetan,
egun gorri haiek.
Abioi zaharren abiada geldia,
bonben burrunbada,
tiroen dunbada,
balen txistua,
sirena hots izugarria,
jendearen arrapalada,
arnasots estua,
larriaren larria,
zaurien min lakarra,
heriotzazko negarra,
ezinaren ezina…,
gorroto lehertuaren
gerrate amorratuaren
adur zikina!
Haurra izan nintzen,
haurra;
baina begietan,
belarrietan,
erraietan
ditut irakiten,
oroimenaren hotsetan,
egun gorri haiek.
Aita kartzelan,
Segovian,
Cuellarko gaztelu zaharraren
itzal hotzaren
itxaropen hertsian;
bizi-alargun ama,
hara ta hona
laguntza eske behin eta berriz
fusilamenduen dardara larriz.
Ni
ezbeharraren
sareetan
nintzen erori,
ta maisuaren
atzaparpetan
“En pie, flecha de España,
Falange victoriosa…”
nuen ikasi,
ta irabazleen
haundikeriazko harrokeria eroan,
galtzaileen
isiltasunezko beldur itoan,
ekinaren
okerraren
leloan
(“Tú no te llamas Mikel,
tú te llamas Miguel!”
“Oye, tú, aldeano,
habla en cristiano!”
“Calvo Sotelo,
Onésimo Redondo,
José Antonio Primo de Rivera,
Franco, Franco, Franco…
¡Arriba España!”),
ez nintzena izaten
irakatsi zidaten.
Haurra izan nintzen,
haurra;
baina begietan,
belarrietan,
erraietan
ditut irakiten,
oroimenaren hotsetan,
egun gorri haiek,
bihotzaren pozetan
ezereztu nahiez
ahazturaren hautsetan.
Susa argitaletxearen Basquepoetry ataria.
![](/dok/testu-bankua/literatura/041/images/image3.jpg)
IKUS HAU ERE
Mikel Zarate Susa argitaletxearen “Literaturaren Zubitegia” webgunean.
BUTRON, Joseba (1991). Mikel Zarate. Bidegileak bilduma. Gasteiz: Eusko Jaurlaritzaren Argitalpen Zerbitzu Nagusia.
Irudiak
- Gure Gipuzkoa, Fondo Foto Car. Vicente Martín. https://www.guregipuzkoa.eus/
- Enfo.
This file is licensed under the Creative Commons Attribution-Share Alike 3.0 Unported license. Via Wikimedia Commons.