(...)
La Elka toponimian oso hedatua dagoen elke edo elge 'landutako alorra'-tik atera dela dirudi, agian aurkitu ez dugun *(La) Elkea baten bidez [Ez nahitaez, olka (oka-ren aldaera) ere izan daiteke eta. Ikus A. Irigoien, "Los Topónimos oca y su entorno", Symbolae, 1007-1016. orr.]. Izan ere, 1689an azaltzen da aurrenekoz (ikus Ormakieta), Galipentzuko euskara indargabetzen ari zenean, eta ez da harritzeko ordurako desitxuratuxea egotea (cf. Eslabako Elkea > Arkea, Elketxipia > Sarkitxipia). Gaurregun, jasan duen itxuragabetzearen ondorioz, modu askotara ebakitzen da. Guk aldaki hauek bildu ditugu: Elka [élka], Elaika [eláika]; Eleika [eléika], La Elka [laélka], Laika [láika] [Hauetaz gain, Diputazioaren 1975eko mapetan azaltzen den La Eca aipa daiteke.]. Zernahi gisaz, dokumentazioan ia beti agertzen dena Elkea-ren aldakia den La Elka da. Izen honen lehen lekukotasunean ikusten denez, "corraliza" ere bazen, dermioa ezezik (ikus Corraliza sarrera). Egun, alderdiaren erdi aldean dagoen muinoari Cantera de la Elka esaten zaio, eta orain dela urte batzu desagertu zen larreari Prado de la Elka [1799an aurkitu dugu aurren aldiz.] edo Prado de Balarata esaten zitzaion. Melenas, Las Ripas, Pontarrón, Meazu, Balarata eta Pollungu-rekin mugatzen du.
(...)