Leku-izenak

(...)
Parrala [parrála] parral erdaldunaren euskaratzearen fruitua da, erakutsian denez. Parral, bere aldetik, parra 'mahatsondo'-ren eratorria da, eta Corominasen arabera [DCELC] 'balatua' edo 'baratzea' adiera zeukan aragoieraz. Gure alderdian ere parrala baratzea-ren adieratik oso hurbil zegoela uste dugu, parralak, baratzeen antzera, herrian bertan edo aldirietan ohi daudelako (cf. Eslabako El Parral) ubide, iturri edo putzu baten inguruetan. Barranco de Parrala herriko iturrian hasten den Barranco de Iturzarra-ren jarraipena da, hots, beheitixeago Barranco de Udareaga izena hartzen duen urbide bera. Errekaren inguruan, esperatzekoa zenez, Parrala-ren barrukotzat jotzen diren baratzeak daude. Garai batez isun-tokia izan zen dermio hau, Udareaga bezala. Parrala, Parralea edo El Parral toponimoa ugaria da gure eskualdeko toponimian. Guk honako hauek ediren ditugu: Parrala Agezan, Parralea Eslaba, Ezporogi eta Leatxen, eta El Parral Eslaba [Agezan bizirik iraun duen aldaera Parrala euskalduna den bitartean Eslaban lehengo Parralea itzuli, eta El Parral erdalduna gorde da], Ezporogi eta Leatxen [Murillo el Fruton ere azaltzen da (PRA-Kaseda, 29. k., 1777)]. 1603ko Parralla aldaera grafia kontu hutsa dela dirudi (cf., dena den, Erriberriko egungo La Parralla. Ikus Senda de Udareaga). Parrala-k Errekandia, Mendi, Udareaga eta San Miguel-ekin mugatzen du.
(...)