Leku-izenak

(...)
[Dermio baten zatiketa. Zokoa] Formari dagokionez, notatzekoa da Zare eta Uxueko hiru toponimoek txokoa gabe, zokoa dutela, hots, igurzkari bizkarkaridun aldakia. Zokoa erdarazko rincón-en baliakidea dela segurua da, toponimo gutxitan aurkitu badugu ere. Adibiderik garbiena egun Rincón de Zonbolozoko bilakatu den Uxueko agirietako (Rincón de) Sulunbatezoko da. Adibide gutxi izateak, ordea, orokortzea eragozten digu, bai eta bazterra-ren baliakidea den ala ez ikustea ere (ez dirudi. Ikus Bazterra).
(...)

(...)
Honek aldaera ezberdin asko aurkezten ditu. Sulumbate 1748an, Zulumbetto- 1768an, Zurunbettu- 1786an, Zulumbettu 1789an, Zulubetto 1802an..., eta ez da erraza nondik atera den argitzea. Lekuko guztiak berandukoak dira (XVIII. eta XIX. mendeetakoak), eta honek toponimoaren jatorria garbi ikustea galerazten du. 1748ko lekukoa aintzat hartzen bada, bukaeran -ate 'portilu' dagoela kontu egin daiteke, baina geroko aldakiak ikusita uste honek aski ustela dirudi. Zernahi gisaz, egungo Rincón de Zonbolozoko [zòmbolozóko] Portillo de Aguilar-en azpiko Aitzandieta-ko zokoa da, eta hau -ate horren alde mintzo da argi eta garbi. Lehen osagaia are opakua da. Sulu- (lehen lekukotasunetan) edo zulu- dela dirudi. Baliteke Sulue-rekin zerikusia izatea, baina hau balizkako kontu hutsa da. Hasierako hortz-hobietako apikaria bizkarkari bilakatzea zoko-ren eraginari zor dakioke.
(...)

(...)
Aurrekoaren aldaera erabat euskalduna da, eta izan ere hau zen uxuetarrek erabiltzen zutena, aipatu egungo Rincón de Zonbolozoko-k berresten duenez. Rincón de Sulunbate beraz, itzulpentzat har dezakegu.
(...)