Leku-izenak

(...)
Puente-ren eratorria dugu hau, bistan denez. G. Rohlfsen ustez [Xavier Ravierrek aipatua, in "Toponymes gascons en R final sensible. Un fait de substrat aquitano-pyrénéen", Symbolae Ludovico Mitxelena Septuagenario Oblatae, Euskal Herriko Unibertsitatea, Gasteiz, 1985, 741-752. orr.] Pontarrón 'pont grossièrment construit' da aragoieraz, eta Nafarroan "zakarki" eraikia izateaz gain txikia ere bada, Iribarrenen arabera [VN. El Pontarron Erriberrin 1620an (PRA-Kaparroso, 27. k.) ageri da, Elon 1790ean (PRA-Kaseda, 33. k.) eta Leten 1630ean ( TCPCI, 233. or.).]. Ciérbidek biltzen duen El Pontarrón ere xubingoa da, zakarki ala dotore eraikia izan den zehazten ez badu ere: "El Pontarrón (C y EP), Mélida. En las proximidades del pueblo hay un lugar donde se reúnen todos los desagües del regadio antes de ir a parar al Aragón. Sobre esa especie de arroyo hay un pequeño puente que da origen al topónimo" Hau berau da, gure irudiz, izen honek Galipentzun duen adiera, eta euskarazko gure alderdiko eta bestetako Xubingoa-ren kide erdalduna izan daiteke (ikus, honetaz, Eslabako Xubingoa). Tafallan eskuarki erreka, errekastoa edo erretena gainditzeko begi bakarreko zubiari esaten zaio "pontarrón": "Normalmente lo aplican a puentes de un solo ojo adintelado, formado por grandes losas horizontales, sobre pies derechos de mampostería, por el que un camino, real o vecinal, salva un barranco, arroyo o canal de riego [...] hubo puentes de esas características y nombre en distintos puntos del término. Los tafalleses conocedores del campo designan así un paraje al SE. de la ciudad, entre el camino (carretera) de San Martín (N), el primer tramo del camino cañada de Valmayor (S) y el prado de este nombre (E), espacio en que hubo dos pontarrones" [Jimeno Jurío, THET, 160. or.] Galipentzun XVI. menderako azaltzen da. Pontarrón Puntarrón [pùntarrón] bilakatu da, euskaraz ezaguna den sudurkari aurreko o > u hersketa burutu delarik: hon > hun; honek > hunek [Erromantzez ere gertatzen da sudurkari + kontsonante-ren aurrean. Ikus honetaz Menéndez Pidalek dioenez, MGHE, 63-64. orr. Zaren El Untinar dugu egun, lehengo *Ontinar batetik. Oibarren berriz La Ontina daukagu.]... Aldakuntza hau 1790ean azaltzen da aurrenekoz, eta ez dirudi oso zaharra denik. Pontarrón El Riacho-ren bi aldeetan hedatzen da, baina bertan gaurregun ez dago zubirik [Hau ez da harritzekoa: Uxuen, adibidez, orain El Puente de la Sierra eta antzina Zubia deitu Aitzandieta-ko errekastoaren ertzeko eremuan ez dago zubirik.]. 1730ean El Pontarron dokumentatzen da, artikulu eta guzti. Galipentzun bertan Pontarrón honetaz landa, Puente edo Pontarrón de Santa Elena zeritzana aurkitu dugu (ikus Santa Elena sarrera). Soto del Pontarrón-ek alderdi honetako zaldu zatia izendatzen du [Ikus Soto sarrera.]. Pontarrón-ek San Juan, Meazu eta Las Ripas-ekin mugatzen du.
(...)