EODA osoa

(...)
Hemen, lehen begiratuan atera litekeen inpresioa goitibeheiti, ez gaude Pedro pertsona izenaz eta beste zerbaitetaz osaturikako toponimoaren aurrean (cf. Zareko Pedrotxiki), piedra-ren eratorri baten aurrean baizik. Iribarrenek [VN.] San Martin Unxeko pedrugal eta Zaraitzu eta Erriberako pedruncal 'harduia' biltzen ditu, itxuraz aztergai dugun pedrocal-en ahaide hurbilak direnak, baina Galipentzun egungo egunean bederen pedruguero eta pedregal erabiltzen dituzte (Uxuen pedrusquero esaten da). Pedrocal-en, gure informatzaileak dioenez, badira haitz batzu, eta hortik atera bide da toponimoa. Tafallan pedroguero eta aztergai dugunaren anaia bizkia den pedrogal [J. Jurío, THET, 157. or.] ibiltzen dira. Pedrocal [pèdrokál] oraindik ere bizirik dago, baina hil hurran, Uxueko Zarabandoa (< Zabalondoa) bezalatsu, kasu. Pedrocal hau Uxueko mugan dago, Aurino alto-n, Portillo de Chinchón eta Aurino bajo-tik hurbil. 1688ko muga-berrikusketa agiriaren arabera [PRA-Kaseda, 4. k.], Uxue eta Galipentzuren arteko mugako hogeitasei eta hogeitazazpigarren mugarriak (Aragoatik hasita) hartzen zituen Pedrocal-ek, eta Beltranlarratza alto eta Monte de Aristuziaga-ren erdian zegoen. Uxueko oraingo Mentangarraz (< Beltranlarraz) eta Galipentzuko Pedrocal elkarrengandik bereiz samar daude, nahiz ez urrun, eta neke da oraingo datuak eta dokumentuetakoak bateratzea. Kontuan hartzekoa da oraingo dermioak eta antzinakoak, izenean bat etorri arren, ez direla beti bat etortzen hedaduran (cf. Ondallu / Las Suertes), eta honek oraingoa bezalako arazoak sortaraz ditzakeela. Pedrocal edo El Pedrocal hutsaz gain, alderdiko harana, mendia eta oihezkia ere dokumentatzen dira.
(...)