(...)
Toki-izen hau oso berandu ediren dugu (1831n), eta dokumentuan azaltzen den aldakiak (Raquineta-k, alegia), hasierako bokalaren aferesia aurkezten du, beste toponimo askok (cf. Resoreta, Recaldea, Rotazarra, Repidea...) bezala. Raquineta aurreko *Errakineta batetik atera da, eta hau jatorra izan badaiteke ere, lehenagoko *Errekineta batetik eratorri behar dela uste dugu (cf. Mondacoerrequina Lergan, 1594ean, Mondacoerraquina bilakatua 1761ean).
Agiriak zenbat eta beranduagokoak izan, hainbat joera handiagoa ohi dago erreka, errota edo errege bezalakoak hasierako bokalik gabe azaltzeko. Esaterako, Errekandia 1591 eta 1594eko agerraldietan (lehendabiziko bietan beraz) hasierako bokalaz horniturik aurkitzen dugu, baina hurrengo agerraldietan hasierako e- hori ez da ageri.
Esanahiaz den bezainbatez, erabili ditugun hiztegiek erre aditzarekin erlazionatzen dute, jatorriz dagokion bezala. Lhandek [DBF] 'combustible' dela dio, eta I. Sarasolak [HLEH] 'beroa sortzeko erabiltzen den gaia'. Azkuek[DVEF] adiera honetaz gain, 'hormiguero', 'rotura en los campos' nahasgarria dakar, eta frantsesez 'fournache, tas d'herbes que l'on fait brüler dans les champs'. Dena den, hiztegigile eta gramatikari famatuak bere Morfología Vasca ezagunean [8. zkia., 108. or.] -kin atzizkia aztertzen ari delarik errekin izena biltzen du, eta gipuzkera, bizkaiera eta lapurteraz 'erregai' esanahia duela dio, eta erronkarieraz 'oihan errea' dela.
Errekineta Agezako bereko egungo La Quemada-ren ordaina da, adieraz eta agian tokiz ere bai. Lergan Errekina, Errekinbazterra, eta Mondako errekina ditugu, Sabaitzan Errekineta [Requinetas azaltzen da herri honetako 1894eko katastroan], eta antzeko toki-izenak ezagunak dira Nafarroan [Iruñerrian ere agertzen da: Requin dugu Galar-Zubitzan (J. Jurío, TCPCG, 417. or.), eta Erraquin(a) bidea eta Erraquineta Izun (J. Jurío, TCPCO, 196. or.). Añorben *Errekin-etik atera den Rekin daukagu, Sagasetan bezala (Eleizalde, LVTV). Aezkoan Paco de Errakinetas dugu orbaran, eta honekin batera Errea, Erreaburua [erreabúrwa] eta Erreapea [erreapéa]. Erroibarko Mezkiritz herrian Errekinxarreta dugu (Orreaga Ibarra, MT, 327. or.). Etxarrentxulon, azkenik, Rekiñeta bildu du Eleizaldek.
Beste toki batzutan izen honek -kin-en baliokidea izan daitekeen -ki atzizkia bide dauka (cf. adabaki / adabakin; iragazki / iragazkin...): cf., adibidez, Eguarasko Errekieta (Rekieta, Rekietako iturri, Errekietako iturri); Fermín de Leizaola, TVA, 416. eta 419-420. orr.]. Aldean La Quemada dugu, Melidan (Bardean) eta Kadreitan bezala [Las Bardenas Reales (liburua eta mapa), Jesús Elósegui eta Carmen Ursúa, Nafarroako Gobernuak argitara emandakoa, Iruñea, 1990. Melidan 1667an azaltzen da (PRA-Kaparroso, 75. k.)]. Beste toki batzutan El Quemado [Gulibarko Aginaga eta Larunben, eta Arakil-Hiriberrin aurkitzen dugu. Honekin lotua Burlata herri-izena dugu Iruñe ondoan, eta Errea Esteribarren. Ikus Jimeno Juríoren ETB, 41-42. orr.] edo Las Quemadas [Bidankoze. Bizirik dago] dauzkagu.
(...)
Qué:
Dónde:
Origen:
OV.11