EODA osoa

(...)
Orain galdua den leku-izen hau modu ezberdin askotara azaltzen da dokumentazioan, formarik arruntena Otropeizu delarik. Aldaki hau beste batzuetako Otroperizu-tik atera dela dirudi, eta 1733ko Otropeichu-rekin zuzenki lotua dagoela. Hiru aldaera hauek ikusita jatorrizko forma Otroperitzu dela uste dugu. Hasierako otro- hori zer den ez dakigu, baina honen alboan zegoen Otrollos-en ere ageri dateke, gorago esan bezala. Bukaerako -peritzu ere iluna da guretzat. Toponimo honen lehen agerraldiko otropuyçu-n -putzu daukagula kontu egin liteke, baina honela balitz ez genekiko geroko lekuko guztietan agertzen den tarteko -i- hori nola azaldu. 1628ko Otropeyz-en, 1588ko Galapuz-en bezala, bukaerako bokalaren erortzea daukagu (apokopea, alegia), eta ez dakigu zer neurritan den grafia kontua eta zer neurritan ebakera kontua (cf. Nafarroan horren zabaldua dagoen jatorrizko Larreluze, maiz Larreluz, Larluz, Larlux edo Larlutx bilakatua [Azken toponimo honen forma laburtuak, ordea, oso berriak dira, azken ehun urteetakoak edo.]). Amaierako -tzu hori txistukari baten eta -zu ugaritasunezko atzizkiaren elkarketaren ondorena izan daiteke (cf. Otazu < ote + zu, baina Zuhatzu < zuha(i)tz + zu), baina zerena? *Otroperi(t)z + zu-rena agian? (cf. 1628ko Otropeyz aldaera). Nolanahi ere den, badakigu Camino de Beire-ren ondoan zegoela. Otrollos(txiki)-ren alboan edo barruan eta iparraldetik San Martingo mugaraino hedatzen zela. Badakigu, berebat, Pitillasko bideak bertatik edo ondotik igarotzen zirela (ikus Caminos de Pitillas sarrera). Hortaz, eta laburtuz, dermio hau Beire eta San Martingo mugetan zegoela esan daiteke, orain Busa (eta Otrollos?) deitzen denaren barruan.
(...)