Resurreccion Maria Azkueren lan argitaratu guztiak bildu, katalogatu, sistematizatu eta digitalizatzen ari da Jakin Taldea. Egitasmoa Euskaltzaindiaren eta Bizkaiko Foru Aldundiaren arteko hitzarmen bati esker gauzatzen ari da eta 2015ean amaituko da. Bai Ariztondok, baita Urrutiak ere, lanaren garrantzia azpimarratu dute. Kultura diputatuaren ustez "beharrezkoa da gure erreferente historiko-kulturalak berreskuratzea" eta euskaltzainburuaren esanetan, "Azkue oinarrizkoa da guretzat eta belaunaldi berriek bere lana ezagutzea ere oso inportantea da".
Lana burutzen ari den taldearen izenean, Torrealdaik “urrats kualitatibotzat” jo du digitalizazioa: “Hain da handia Azkueren obra, inork gutxik ezagutzen baitu osorik. Folkloreaz interesatzen dira batzuk, hiztegigintzaz besteak, besteak gramatikaz, besteak linguistikaz, besteak musikaz. Orain, guztia batean emanda, corpus gisa eraturik, eta interaktibotasunari esker, Azkueren obrak beste dimentsio bat hartuko du, eta ikertzaileei aztergune berriak sortuko dizkie. Digitalizazioari esker -gaineratu du- Azkueren ekoizpen intelektual-kulturala gure esku geldituko da oso-osorik eta inolako sekreturik gabe”.
713 artikulu, 85 liburu
Ezaguna da, eta hala gogoratu da gaurko agerraldian, Azkue kapazitate handiko gizona izan zela. Euskaltzainburua izan zen, baita idazlea, literaturgilea, kazetaria, musikagilea eta musika biltzailea, hiztegigilea, hizlaria, irakaslea, folklorista, herri literaturaren biltzailea, hizkuntzalaria, euskalaria, euskaltzalea.
Torrealdaik adierazi duenez, “sormen lana eta bilketa lana biak egin zituen, biak oparo. Azkueren obrak sekulako eragina izan du hurrengo belaunaldietan; galtzear zegoen herri ondarea betiko salbatu zuen, eta bazuen azken orduko bilketa zelako kontzientzia”.
Kazetari gisa idatzi zituen 713 artikulu, eta 85 liburu burutu zituen. Liburu horietako lau lirateke "enblematikoak": Diccionario vasco-español-francés (Hiztegia), Cancionero popular vasco (Kantutegia), Morfología vasca eta Euskalerriaren yakintza.
Joan Mari Torrealdaik azaldu duenaren arabera, “Azkueren obra ia guztiak bera bizi zelarik argitara emanak dira, horietatik 28 XIX. mendean eta gainerako ia guztiak 1936 urtearen aurretik. Geroztik ere Azkueren obraren berrargitalpenak gauzatu dira, bai literaturan eta bai linguistika kontutan”.
Behin lana amaituta -esan bezala, datorren urtean izango da- bilaketak katalogoaren arabera eta gaitegiaren arabera egin ahal izango dira. Lan osoko bilaketa eta egituraren bidezkoa ere aurreikusi dituzte.