Anaitasuna aldizkaria 30 urtetan zehar argitaratu zen: 1953ko ekainetik 1982ko apirilera. Esan bezala, gaur publikoaren eskura jarri den Anaitasuna-ri eskainitako atalean, aldizkariak urte horietan zehar argitaratu zituen 420 zenbakiak daude ikusgai: 1.200 lankide inguruk idatzitako 6.395 artikulu, hain zuzen ere. Zenbaki horietako edukiak lau modu desberdinetan sailkatuta daude: egile, gai, artikulu eta urteen arabera.
Artikulu bakoitzari fitxa bat dagokio. Fitxen egitura beti bera da: egilea, izenburua, saila, zenbakia, data eta orrialdea.
Aldizkariaren 420 zenbakiak PDF eta WORD formatuko dokumentuetan ordenatuta daude, urtez urte eta zenbakiz zenbaki multzokatuta. Zenbaki bakoitzari PDF eta WORD dokumentu bana dagokie.
Gainera, Anaitasuna aldizkariari eskaintzen zaion gunean, Joan Mari Torrealdaik aldizkariaren historiari eta edukiei buruz egindako azterlana ere badago. Hala bada, bertan azaltzen dira sortzearen nondik norakoak -Imanol Berriatuak sortu zuen Anaitasuna, eta hasieran lau orrialdeko eliz orritxoa zen, bizkaieraz idatzia-, aldizkariak bere historian izan zituen aroak, euskara batuaren aldeko egin zuen hautua, ildo ideologikoa, formatuen aldaketak, kolaboratu zuten idazleen zerrenda, arazo ekonomiko eta bestelakoak...