Irantzu Mankomunitateko udalak diren Abartzuzako, Lezaungo, Oteitzako, Jaitzeko, Villatuertako, Gesalazko Ibarra eta Deierriko euskaldun eta euskaltzaleek osatzen duten Irriherri elkarteak gogorarazi duenez, aurtengo matrikulazio kanpainan, herriko ume guztiek D eredua aukeratu zuten, baina Nafarroako Gobernuaren Hezkuntza Departamendutik ezezkoa jaso zuten, ikasle gutxi zirelakoan. Hori dela-eta, euskaraz bizi eta ikasteko eskubidea aldarrikatzeko asmoz, larunbatean Abartzuzara joateko gonbita zabaldu dute.
2014-15 ikasturterako matrikulazio kanpaina zabaldu zenean, Nafarroa osoan D ereduaren aldeko adierazpena kaleratu zuen Euskaltzaindiak. Akademiaren Osoko bilkurak aho batez onartu zuen, 2014ko urtarrilean.