(...)
Egungo Mundotxokorro [mùndochokorró] Andua eta Errekina-ren artean, Oletako bidearen ondoan dagoen mendiko baten izena da. Gure ustez muno-ren txikigarria datekeen muniko eta zorrotz izenondoaren aldaera adierazgarria (txikigarria) den txorrotx izan ditzakegu hemen: Cf. Abaurregaineko Mendizorrotz, honen kide erdalduna den Monteagudo herri-izena, bien arteko zerbait den Mendikute deitura, Iberoko Muruzorrotz [TCPCO, 141. or.], Arripodaseko 1710eko Moco zorroz [otra pieza en el mismo paraje de celaya llamada moco zorroz". PRA-Irunberri, 3. k.] edo Agezako Puntazorrotza. Izenondoaren aldaera adierazkorrari dagokionez, berriz, cf. Bidankozeko Txorrotxarria toponimoa. Muno + ko elkarketatik munoko espero genuen, edo muino [múño]-n oinarritzen bagara (cf. 1609ko Muñuquicorroz), muñoko, ez 1565eko Muniquozoroz eta 1668ko Municochorroch-en dugun muniko. *Munoko > muniko pausoan *munoko-ren baliokidea den mendiko (cf. 1827ko Mendicochorroch aldaera [PRA-Oibar, 109. k.], edo Lergako bertako Areamendikoa edo Iguraimendikoa toponimoak)-ren eragina egon zitekeen, bai eta, ausaz, gaztelaniako -ico txikigarriarena. Era berean, ezin da ahaztu lekuko batzutan behintzat sabaiko sudurkaria azaltzen dela, eta lehen lekukotasunen artean muñoki- (edo honen desitxuraketa arina dirudien muñuki-) aurkitzen dugula [Muñoki- > Muñiko- pausoa metatesiz azal daiteke. Tarteko -ki- hori Burlatako Idoikikoa-n (J. Jurío, ETB, 67. or.) edo Ameskoako Zalduki, Kortaki, Iturriki edo Mendiki-n azaltzen den hizki identifikatugabea izan liteke (ikus Luciano Lapuente, TAM, 407-408. orr.). Cf. Lergako bereko Zamiki.]. Txorrotx izenondoaz den bezainbatez, lehen lekukoen artean -zorro(t)z azaldu arren 1648rako aldaki adierazkor-txikigarria edireten dugu, eta gero sarritan agertzen da. Toponimo honen desitxuraketa oso goiztiarra izan zen, euskara galdu baino aise lehenagokoa. Dokumentazioan makina bat aldaki ezberdin ditugu, aipaturikakoez landara: Munducochorroch (1690), Munduco chorroz (1708), Munduco chorros (1714), Munducuchurruch (1718), Mundachochorroc (1771), Mundicochorrot (1836), Mondocochorrot (1897).
(...)