(...)
Beste alde batetik deituretan Lasa forma Latsa-ra iraganeraztea oso problematikoa dela iruditzen zait, ordea, Lazcano forma Lazkao bihurtzea den bezalatsu, edo Cenarruzabeitia ezaguna Ziortzabeitia, edo Bilbao La Vieja deitura Bilbao Zaharra, edo Pérez de Arrilucea konposatua Perez Arriluzeko, -eta ez Arriluzeako, noski-, edota Alegría delakoa Poza, -erdal toponymo ezagunaren forma berberekoa-, ez baitaude isolaturik, eta halako oinarria ipintzeak urrunegi eraman baikaitzake, eta kasu asko ta askotan, batez ere garden ez direnetan, aterabiderik gabeko osin batera, deitura askoren jatorria ez baita erraz jakin ahal izaiten egungo egunean esku arrean ditugun ezagupide murritzen arauera [8. oin oharra: Euskal Nazioan eta gobernuan edota gobernuetan horri bide emaiteko benetako borondate politikorik balitz halako gai batek ikerketa sakona eskatuko luke, eta horretan gai diren hainbat pertsonak, beren beregi lanari loturik, eta ez bakoitzaren ordu libroetako borondate hutsez, arduratu beharko luke genealogiaginen, eta hala ere mormoiei deitu beharko litzaieke laguntza eske. Euskal Akademiaren struktura ez da berez horretarako egoki, eta hura gehiegi bortxatzeak ez dakar gauza onik]. Gehienez ere Lasa, Lazkano eta Zenarrutzabeitia erara izkribatzea ontzat har liteke, euskal graphiazko zuzen den itxura bat emanik, eta, jakina, Lacha-ren ordez Latxa. Agian Perez Arriluzeko ere bai, azken finean Arriluzea euskal toponymiatik heldu baita. Edozein modutan ere kontuan izan behar da beti deiturek bere eragina oso eremu sozial zabalean dutela
(...)

(...)
P.S. Azaroaren 18-an, izkribu honi sarrera emaniko egun berean Bilbon izaniko batzarrean in voce proposatu nuen Lopez de Arrilucea eta antzeko deituretan Lopez Arriluzeko erara erakarri nahi lukeenik ager baledi, -genitivoko -ko berrekailua hartzerakoan Arriluzea artikuluduna hura gabe agertzen baita-, kasu hori kontextuak eskaturiko aldakuntza partzialtzat hartu behar litzatekeela, eta ahaleginak egin behar liratekeela, norma juridikoak erabiltzen dituztenen artean hala aitorturik izan ondoan, aldatzeko bide erraz simplifikatua eskain dakien halakoei, eta zutik dagoen legea aldatu gabe ere agian egin litekeela hori, baldin juriston artean borondate okerrik erakuts ez baledi interpretazioa egiteko garaian
(...)