(...)
Egungo Las Ilarrerías [làsilarrerías] beste zerbaiten desitxuratzea dela dirudi, eta ez dakigu euskarazko ilarra edo ilarrea [Iribarrenek aipatzen du azken hau, VN-n] landare-izenarekin zerikusirik baduen, Reta Janáriz-ek proposatzen duen moduan [EHZE, 493. or. Honela dio autore honek: "Ilarrerías. De un *«ilarregia», de «ilar» «brezo», suf. abundancial «-egi», y art. «-a», con «-s» romance, es decir, «el brezal». Se ha producido un trueque de «-g-» en «-r-» por influencia progresiva". Andian Illarral eta Illarregi ditugu, eta Erizkizundi Irukoitza-ko 384. orrialdean ilarrerria izen arrunta biltzen da (cf. oloerria, tipulerria...)]. Ilarra eta honen aldaerak diren inarra, txilarra, ginarra... eta beste oso ugariak dira euskal toponimian, eta baliteke hemen ere, esan gisan, horietako baten aitzinean egotea. Prado de Aldea-ren azpian dago, Eslabako mugaren eta El Castellano eta La Calera-ren artean. El Saso de las Ilarrerías Prado de Aldea (behialako Aldeko euntzea)-ren azpiko lur kaskailutsuari esaten zaio, eta euskarazko Aldeko kaskailua izan daitekeela uste dugu.
(...)