elikatu, elika, elikatzen
1 da/du ad. Bizitzeko behar diren gaiak edo mantenugaiak hartu edo eman. Ik. bazkatu 1. Nire eginkizun bakarra botikak hartzea, elikatzea eta arnastea zen. Horren gaizki elikatzen ote gara? Egoki elikatzeak lagundu egiten du eritasunak saihesten. Barazki hutsez elikatuko litzateke asteko bost egunetan. Jabeak ezin izaten dituzte behar den bezala zekorrak elikatu. 2 da/du ad. Gauza abstraktuez mintzatuz, bizirik irauteko edo aurrera egiteko behar duena hartu edo eman. Ik. bazkatu 3. Bere itxaropena elikatzeko. Irakurriz ikasten da idazten, eta behin eskua hartzen zaionean, irakurtzen jarraitu behar da, hori baita burua elikatzeko modua, garuna abian jartzekoa. Horrek katalan independentismoa elikatu besterik ez du egingo. Sare sozialak elikatu. Jokoaren errentagarritasuna irabazi errazaren fantasiaz elikatzen da. 3 da/du ad. teknol. Tresna bat edo mekanismo bat ibiltzeko behar duen gaiaz edo energiaz hornitu. Elektrizitatez elikatutako tresna. Elikatzeko erabiltzen den korronte motaren arabera, bi motor mota bereizten dira. Hegazkinetako erreaktoreetan bezala, presio altuko airearen eta gasaren errekuntza erabiltzen da turbina elikatzeko. Plakari eusteko balio duten konektore eme horiek berek elikatzen dute zirkuitua. Motorra etengailu bipolar baten bidez elikatzen da sare elektrikotik.