Leku-izenak

(...)
Toponimo hau tarteko herskari belarez aurkitu ohi dugu, baina behin gutxienez herskari horzkaridun aldaera azaltzen da, 1726an. Hortaz, duda egin dezakegu jatorrizko forma zein ote den erabakitzerakoan. Antzinatasunak Burgaloki-ren alde jokatzen du, baina Puiun Burdaloquis aurkitzeak [PRA-Oibar, 96. k., 1816.] jatorrizko forma horzkariduna dela pentsatzera eraman gaitzake. Hala ere, Araban [Mitxelenak aipatua, AV, 77. or.] burgu 'burgo'-ren eratorria den burgari 'vecino que gratuitamente turna como guarda de campo en los lugares pequeños' bizirik egoteak, Itza zendeako Lete herrian Burgaburu eta Burgaria (Burgadi, Burgadia, Burgari...) agertzeak [J. Jurío, TCPCI, 214. or. Burgaria-ren kasuan bukaerako -di hori Lizardi, Pagadi... eta bestetan ageri den atzizki multzokaria dela pentsa liteke, baina lehen lekukoa 1543ko Burgaria izatea uste honen kontra joan liteke apika. Aipatu atzizki hori balitz, *burgu landare, harri edo lur motaren bat dela kontu egin liteke, -di honelako oinarriei eransten baitzaie. Mitxelenak Burgu-rekin erlazionatzen duen (nahiz seguritate gutxiz) Burgi (Murgia...)-rekin ere lot liteke agian.], Uxuen bertan belaredun aldaerak lehenago dokumentatzearekin batera, Burgaloki aldaera hobestera eraman gaitu [Puiuko aipatu toponimoa oso berandukoa da, eta Uxueko Burdaloki bezala nahasketa baten fruitu izan daiteke. Bukaerako -s hori erdararen eraginari zor zaiola zalantzarik ez dago.]. Burgaloki, hortaz, esanahi garbiegirik ez duen burgari eta -oki 'toki'-z osatua egon liteke. Toponimo honen adiera, Lerga eta beste herri batzuetako Iguraimendia edo Iguraimendikoa-ren parekoa izan liteke, alegia, 'iguraia ardantze, alor edo basoak zaintzen izaten den tokia' (gaina normalean) adiera izan lezake. Beste herri batzuetan kapana toponimoa aurkitzen dugu horrelako muinoak adierazteko. Hurbilena Uxue eta Galipentzuren arteko mugako Kapana edo Kapanandia da (ikus bi sarrera hauek, Galipentzun). Burgaloki La Sierra-n zegoen, Pitillastik Berage-ra igotzen zen bidearen alboan. Monte de Berage (Berageondoa?) eta Camino de Murillo-ren ondoan.
(...)