Bai, eta ondorioz, zuzenak dira horiek denak. Orobat dira zuzenak hauek ere:

1. Hamarretatik bi etorri dira / Hamarretarik bi etorri dira; eta Hamar ikasletarik bi etorri dira.
   1. (Hamarr(e)tatik eta hamarr(e)tarik horiek sintagma mugagabeak dira).
2. Gisa berean dira zuzenak hauek ere: Hogeitatik/hogeitarik hamarrek salatu dituzte tratu txarrak; eta Hogei emakumetarik hamarrek salatu dituzte tratu txarrak.

Euskaltzaindiak ez du batasunerako berariazko araurik eman; beraz, denak dira zilegizkoak.

Kontua de Hegoaldean unitate-izenez eta zenbatzailez osatutako izen-sintagmak mugatu singularrean (-tik) erabiltzeko ohitura dagoela ―eta molde hori ari da hedatzen euskara estandarrean, oro har―, baina sintagma mugagabeak (-tatik, -tarik) ere zuzenak dira.

Kasu-joko hori berdin da baliagarri neurri-unitate modura izen bat hartzen denean ere: ikasle, emakume, kide, ontzi, gazte… Horrexegatik dira zuzenak galderako bigarren multzoko adibideak ere.

Har dezagun beste adibide bat. Esaterako, Estatistikaren arabera, hamar (…) probatu dute marihuana. Hutsune horretan aukera hauek guztiak zilegizkoak dira:

- gaztetik seik
- gaztetatik seik
- gaztetarik seik