Kontaidazu forma da erabiliagoa, baina esan behar da arautu gabeko esparrua dela aginterako forma semisintetikoena; galderako moduko adizki-moldeena, alegia.

Berezko aditz sintetikoen formak (hau da, etorri, joan, eraman… aditz ezagunenak) araututa daude, eta hemen ikus daitezke: Euskal Aditz Batua.

Berezko forma horien ondoan, baina, mimetismoz edo kopiaz eraturik, itxura bereko adizki analitiko kontraktatuak daude, semisintetiko izendatu ohi direnak (modu sintetikoan osaturiko adizki perifrastikoak, alegia): jakizak, garbizazu, ulertuidan, begiraiozu… Era horretakoak ez daude araututa oraingoz. Multzo horretan sartzen da galderako kontaidazu/kontadazu bikotea.