Bio- aurrizkiari dagokionez, ikusirik nola dauden jasoak Euskaltzaindiaren Hiztegian aurrizki horrekin hasitako hitzak −esaterako, bioaniztasun, biodegradagarri, biodinamika, bioerregai, bioeraikuntza−, eta hiztegi hori arauemailea denez gero, bioneuroemozio hitza dena loturik (marratxorik gabe, alegia) idaztea da gomendatzekoa. Badirudi hori dela bio- erantsitako hitz guztietarako bidea euskara batuan.

Poli- (fr. poly-) aurrizkiari dagokionez, Euskaltzaindiak batasunerako arautuak ditu aurrizki hori duten hainbat hitz: polifonia, poligamia, poliglota, poligono, poliklinika, polisemia, politeismo, polimorfo, polikromo eta abar. Hitz horietan guztietan poli- aurrizkiak 'hainbat, asko' esan nahi du. Beraz, polipsikismo izango litzateke (> polipsikiko) forma.