Zuzena al da egin aditza esaldi honetan?: Plataforma digitalak ugaritu egin direnez geroztik, pantailei begira ematen dugun ordu kopuruak gora egin du.
Ez da tradizioduna. Gai honi buruz, Euskararen Gramatikak hau dio: “Perpaus nagusietako adizkien ezaugarria da egin hori; ez da erabiltzen mendeko perpaus jokatugabeetan, eta nekez aurkituko dugu mendeko jokatuetan”.
Beraz, esaldi arrunta hau da: Plataforma digitalak ugaritu direnez geroztik, pantailei begira ematen dugun ordu kopuruak gora egin du.
Tradizioari erreparatuta, esan dezakegu perpaus osagarrietan (-(e)la), kausaletan (-(e)lako) eta moduzkoetan (-(e)nez) bai ageri dela egin aditza galdegaiaren lekuan, adibide bakanetan bada ere. Euskaltzaindiaren Hiztegian, adibide hauek ikus ditzakegu, besteak beste: Onddoaren hifak kizkurtu egiten direlako esaten zaio circinatum onddo horri (hifa sarreran); Iraungitze data dute, amaitu egingo direlako (iraungitze data sarreran); Urtetik urtera elur-jausiak ugaritu egin direnez,… arriskua handiegia dela uste dute (masifikatu sarreran).
Data: 2024-07-15
Informazio gehigarria:
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.