Nola deklinatu behar da AEB (Ameriketako Estatu Batuak)? AEBko ala AEBetako? AEBk ala AEBek?
Euskaltzaindiaren 196. arauan (15.4 puntuan) jasoa dago sigla hiru letraz osatua dagoenean (kasu honetan, <bokal + bokal + kontsonante> hurrenkerarekin) letraka irakurri behar dela, eta hori da AEB siglaren kasua.
Nola deklinatu zehazteko, lehen-lehenik kontuan hartu behar da izendapen berezi bat ordezkatzen duela AEB siglak. Bigarrenik, letraka irakurtzen dela (beraz, beti bokalez bukatzen da). Eta azkenik, izendapen berezi bat laburtzen duen sigla denez gero izendapen osoa ordezkatzen duela, artikulua barne, singularra zein plurala izan. Hau da, Ameriketako Estatu Batuak estatuko sigla AEB da, (eta ez *AEBak).
Beraz, AEB, eta hortik abiatuta, AEBko, AEBk, AEBri, AEBren…
Data: 2024-07-15
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.