(...)
Reta Janárizek Pollangu gure ustez okerra biltzen du, eta pollianicus proposatzen zalantzazko jatorri gisa. Orri azpiko ohar batean -ango bukaerarekin lotu nahi du, Mitxelenak AV-n aipatzen duen euskal amaiera honen eta erromantzearen -anco-ren arteko itxurazko batetortzean oinarrituz. Egungo egunean ordea, Pollungu [pollúngu] edo Pullungu [pullúngu] esaten da, eta dokumentazioan Pollungo (1546), Pollongo (1596), Pollungu (1608), Pollungoa (1616), eta Pollongu (1691) aurkitzen dugu, baina sekulan ez Pollangu-ren modukorik. Egungo Pollungu 1335ean ediren dugun Poyluengo (< podiu longu)-ren euskalduntzea baizik ez da. Dermio honen zati bat bederen (herritik hurbilen dagoena) muino edo boiu (ikus Eslabako Boiuartea eta Boiugain-en eta Galipentzuko Puyalato-n dioguna) luze bat da. 1798ko Alto de Pollongu-n kontzeptu bera dugu, errepikatua (cf. Boiugain). Entrada de Pollungu Agezako Kanpobarrena-ren alboko eremua zen, baina ez dirudi zeharo finkatutako leku-izena denik. Pollungu-k Agezako lurrekin, Larreta, Bartasteka eta La Elka-rekin mugatzen du. Portillo de Pollungu altxonbidearen eta Camino de los Molinantes-en arteko bidegurutzean dago, Portillo de Bartasteka-ren ondoan.
(...)