—Hodeiertzean, urrutirat, ezagun zen erresuma bat gaitza, nehon ikusten ez den bezalakoa. Ametsetatik baizik ez zaigu halakorik agertzen. Ez zen ametsetakoa bizkitartean hura; zinezkoa zen.
Uraren gainetik goititzen zen, eta heltzen zeruraino. Osoan hartuz, iduri zuen elurrez egina. Bainan bazituen hiruzpalau maila bederen, bat bertzea baino zokorat sartuago, eta maila bakoitzean ageri ziren han-hemenka itzalgune batzuk, guti edo aski beltzak: erresuma hartako herriak edo hiriak, beharbada... Goien-goienean, non ere baitzuen hunkitzen zeru urdina, erranen zenuten elurra harro-harro zela metatua, meta bakoitzari zetxekiola kukula zuri, biribilean hozkatu bat.
—Hauxe da ateraldi eroa! Laino tzar zurpail batzuek hola dizute kaskoa berotzen zuri?
—Lainoak?! Nork daki lainoak direnetz? Eskua suan eman zenezake hodeiek bakarrik dutela egiten, dezaketela egin halako erresuma?
Ori, nahi duzu jakin ene barneko berri? Ene ustea da, ene sinestea, hari luzaz so egonik zirela noizbait abiatu itsasoz itsaso gure arbasoak. Hauek beti joanki, joanki beti aitzinago, eta hura beti haratago gibelatzen, baina beti bere tokian halere eta beti berdin eder; egunetik egunera zoragarriago baizik ez, izatekotz. Ez dakit behin ere kausitu ahal ukan zuten gaizoek; dakidana da kausitu zutela bederen Ameriketako lurra. Ez zen hau lilurazko erresuma bat, ala bai?
ETXEPARE, Jean (1988). «Itsasoa kukulauka» in Beribilez. Maria Jose Kerejetaren edizioa. Donostia: Euskal Editoreen Elkartea. (68-69).
IKUS HAU ERE
Jean Etxepare Susa argitaletxearen “Literaturaren Zubitegia” webgunean.
ARRIGAIN, Isabel (2004). Jean Etxepare. Bidegileak bilduma. Gasteiz: Eusko Jaurlaritzaren Argitalpen Zerbitzu Nagusia.