![](/dok/testu-bankua/hizkuntza/009/images/image4.jpg)
1. Bai Euskarari kanpainaren amaierako jaialdia Bilboko San Mames futbol-zelaian, 1978ko ekainaren 17an.
![](/dok/testu-bankua/hizkuntza/009/images/image2.jpg)
Zuzeneko diskoa BADOK atarian.
![](/dok/testu-bankua/hizkuntza/009/images/image7.png)
Bilbon, euskaltzainburuaren hitzak Santimamiñeko futbol-zelaian:
Jaun-andreak, agur t’erdi eta gau on!
Jaialdi honi hasiera ematerakoan bihotzez agurtu nahi zaituztet guztiok. Bai zelai eder honetan zaudetenok, eta bai bertora etortzerik izan ez duzuenok ere.
Nire hitzak eskerrak ematekoak izan bitez aurrenik. Eskerrak, Bai Euskarari kanpainan parte hartu duten guztiei; eskerrak, baita ere, gaurko jaialdian euskararen eta Euskaltzaindiaren alde jokatu nahi izan duten dantzari, kantari eta bestelako taldeei.
Benetan harriturik eta txunditurik nago eta pozez gainezka, kanpaina honek izan duen erantzun bikain-bikaina ikusirik. Horrek esan nahi du Euskal Herria bizi dela oraino, eta gure herri honetan badela gogo eta borondate euskara onik ateratzeko, dagoen egoera kaskarretik beste egoera hobe batera aldatzeko.
Euskararen aldeko kezka eta sua piztu nahi izan du kanpaina honek. Izan ere, euskara da gure herriak duen bereizgarririk agiriena, gure asabengandik datorkigun ondasun paregabea. Baina ondasun hau gordetzeko, bizirik eta osorik ateratzeko, guztion lana, lehia eta ahalegina behar ditugu. Eta Bai Euskarari kanpainak zerbait erakutsi baldin badu, horixe erakutsi du, alegia: gogo hori badela, eta, beraz, itxaropenez begira diezaiokegula etorkizunari.
Euskaltzaindia euskararen alde lan egiteko eta euskal arazoetan gidari izateko jarri eta izendatu zuen gure herriak bere ordezkarien bidez. Eta gaur, kanpaina honek herriarengandik izan duen erantzun ezin hobea ikusi ondoren, nik Euskaltzaindiaren beraren izenean hauxe esan nahi dizuet: hemendik aurrera, zuen laguntza eta atxikimenduari eskerrak, gure elkarte hau oldar berriz eta gogotikago lotuko dela bere zeregin handi horiek betetzera.
Bai Euskarari kanpaina honen ondorio eta fruitu bezala, Euskaltzaindiak lehenbailehen plangintza orokor bat antolatuko du, era askotako egintzak bultzaturik euskararen eta euskal kulturaren alde.
Eskerrak, bada, berriz ere, Euskaltzaindiaren izenean, kanpaina honetan lan egin duen orori eta bere ahalen neurrian bere emaitzaz lagundu digun bakoitzari.
Eskerrik asko.
Gora euskara!
Gora Euskal Herria!
1978ko ekainaren 17an.
![](/dok/testu-bankua/hizkuntza/009/images/image6.jpg)
![](/dok/testu-bankua/hizkuntza/009/images/image3.png)
Euskera agerkaria XXIII, 1978-1, Euskaltzaindia, 365.-368. or. Jatorrizkoa, hemen.
IKUS HAU ERE
PEREZ GAZTELU, Elixabete (2000). Luis Villasante. Bidegileak bilduma. Gasteiz: Eusko Jaurlaritzaren Argitalpen Zerbitzu Nagusia.
Irudiak:
- Wikipedia Commons.
Irudi hau Creative Commons Aitortu 3.0 Unported lizentziaren mende dago.
- Bidegileak bilduma.
- https://www.euskalmemoriadigitala.eus
- https://www.karmelaldizkaria.eus/