NOEREN ONTZIA

Berrehun eta hiru zebra ginen eta korrika
gindoazen denok lur lehorra zapalduz,
eta Hogeita laua, Hogeita bosta eta Hogeita seia
neuzkan nik aurrean, atzean Hirurogeita bata,
Hirurogeita bia eta Hirurogeita hirua,
eta bat-batean Ehun eta hemezortziak,
Ehun eta hemeretziak eta Ehun eta hogeiak
albotik aurreratu gintuzten ibaia!
oihu eginez, ura!, ibaia!,
eta Hogeita laua, Hogeita bosta eta Hogeita seia
ibaia!, ura! oihuka hasi ziren,
eta Laurogeiak, Laurogeita batak, Laurogeita biak ere,
aurrea hartu ziguten zalapartan ura!, ibaia!,
eta Hogeita bostak ezkerrera egin zuen,
eta Hogeita lauak eta Hogeita seiak eskuinera,
eta eguzkia ikusi nuen ibaian, ura distiratsu,
ura distiratsu eta aurrera, aurrera egin nuen,
eta Zazpiarekin eta Zortziarekin gurutzatu nintzen,
eta bustita zetozen, ahoa bete ur bustita,
eta aurrera egin nuen eta Bostarekin eta Seiarekin
gurutzatu nintzenean krokodiloak! esan zuen Seiak,
eta aurrera, aurrera, eta krokodiloak!, krokodiloak!
egin zuten denek oihu, Seiak, Bostak, Hamazazpiak,
Hamarrak, Hogeiak, denek oihu krokodiloak!,
krokodiloak!, eta nik ura edan nuen,
ura ibaian, ur distiratsua, ur eguzkiz betea,
eta kontuz!, krokodiloak! egin zuen oihu
nire ezkerrean Hogeita bostak,
eta ur distiratsuan busti-bustita atera nintzen,
eta Berrehun eta bostarekin eta Berrehun eta biarekin
gurutzatu nintzen eta krokodiloak! esan nien, krokodiloak!,
eta korrika segi nuen lur lehorra zapalduz,
eta Hogeita laua eta Hogeita seia neuzkan aurrean,
eta hutsune bat zegoen haien artean eta jauzi, jauzi,
jauzi egin nuen eta hutsunea niretzat hartu,
eta korrika segi nuen lur lehorra zapalduz.

Ehun eta laurogeita hamazazpi zebra ginen,
eta korrika gindoazen denok lur lehorra zapalduz,
eta Hamarra, Hamaika eta Hamabia neuzkan nik aurrean,
eta Berrogeia eta Berrogeita bata atzean.

ATXAGA, Bernardo (2023). Paradisuaren kanpoko aldeak. Arre: Pamiela. (127-128).