![](/dok/testu-bankua/abestiak/017/images/image2.jpg)
Karnakeko tenplua, Tebas, ca. 1895.
Zazpi atedun Tebas hura, nork eraiki zuen?
Liburuetan errege-izenik baizik ez da ageri.
Erregeek garraiatu ote zituzten harritzar haundiok?
Eta hainbatetan porrokatua izan zen Babilonia,
nork jaso zuen beste hainbestetan? Lima distirant hura
eraiki zuten langileak, zer etxetan bizi ote ziren?
Txinako Harresia bukatu zen iluntzean,
nora jo zuten harginek? Erroma bikain hura,
garaitza-arkuz beterik. Nork altxatu zituen?
Nortzuk menderatu zituzten zesarrek?
Hain ospetsua zen Bizantziok, jauregiz besterik
ez ote zuen bertako jendearentzat? Alegiazko Atlantidan berebat,
itsasoak irentsi zuen gauean, biztanleak ito zorian
oihuka hasi zitzaizkien esklaboei laguntza eske.
Alejandro gazteak India bereganatu zuen.
Berak bakarrik ote?
Zesarrek galoak menderatu.
Ez ote zuen berarekin sukaldari bat bederen?
Felipe Espainiakoak negar egin zuen bere Armada
urperatu zenean. Ez ote zuen beste inork negarrik egin?
Federiko Bigarrenak Zazpi Urteko Gerra irabazi.
Nork bestek zuen irabazi?
Garaitza bat orrialde bakoitzean.
Nortzuk atondu zituzten garaitza-banketeak?
Hamar urtez behin gizon handi bat.
Nork ordaintzen zituen haren gastuak?
Zenbat historia, hainbat galdera. Historiak bezainbat galdera.
Zenbat historia! Zenbat galdera!
Musika: Mikel Laboa.
Itzulpena: Joxe Azurmendi.
KANTAREN BESTE BERTSIO BAT
Mikel Laboa, Lau-bost, Elkarlanean, 1980.
IKUS HAU ERE
Bertolt Brecht Susa argitaletxearen “Euskarari ekarriak” bilduman
Irudia
Rijksmuseum via Wikimedia Commons.